ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នឹងបើកសវនាការជំនុំជម្រះជាសាធារណៈលើបណ្ដឹង/សំណុំរឿង ចំនួន ២ នៅថ្ងៃទី២ ខែមិថុនា ឆ្នាំ២០២២ ស្អែកនេះ។
បើតាមសេចក្តីជូនដំណឹងរបស់ គ.ជ.ប សវនាការនឹងបើក ជំនុំជម្រះជាសាធារណៈលើបណ្ដឹង/សំណុំរឿង ចំនួន ២ នៅថ្ងៃទី២ ខែមិថុនា ឆ្នាំ២០២២ សវនាការបើកជាសាធារណៈ នាថ្ងៃទី២ ខែមិថុនា ឆ្នាំ២០២២ វេលាម៉ោង ២:០០នាទីរសៀល នៅទីស្តីការ គ.ជ.ប ដើម្បីជំនុំជម្រះលើបណ្តឹង/សំណុំរឿង ចំនួន ២ មានលេខ ១៤៨ និង លេខ ១៤៩ ចុះថ្ងៃទី៣០ ខែឧសភា ឆ្នាំ២០២២។
សមាសភាពក្រុមប្រឹក្សាជំនុំជម្រះមានប្រធាន គ.ជ.ប ជាប្រធាន លោក ប្រាជ្ញ ចន្ទ និង អនុប្រធាន គ.ជ.ប លោក នុត សុខុម និងសមាជិក គ.ជ.ប ចំនួន ៧ រូបទៀត ជាសមាជិក ក្រុមប្រឹក្សាជំនុំជម្រះ។
សូមជម្រាបជូនថា ពាក្យបណ្តឹងទាំង២ ខាងលើនេះមានកម្មវត្ថុប្តឹងតវ៉ា និងប្តឹងជំទាស់នឹង សេចក្តីសម្រេចរបស់គណៈកម្មការរៀបចំការបោះឆ្នោតខេត្តកំពង់ចាម ពាក់ព័ន្ធនឹងសកម្មភាព របស់បេក្ខជននៃគណបក្ស ភ្លើងទៀន ក្នុងអំឡុងពេលនៃការឃោសនាបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅស្រុកកងមាស ខេត្តកំពង់ចាម៕
